ევროკლუბის კურსდამთავრებულთა ქსელის შეხვედრაზე მონაწილეობა ჩემთვის მნიშვნელოვანი გამოცდილება იყო. ტრენინგის ფარგლებში ექსპერტმა ლელა ჯავახიშვილმა ახალგაზრდებთან ერთად განიხილა, რას ნიშნავს თანასწორობა, რატომ არის ის დემოკრატიული საზოგადოების საფუძველი და როგორ ვლინდება ყოველდღიურ ცხოვრებაში.
ყველაზე საინტერესო ნაწილი დისკუსია აღმოჩნდა, სადაც მონაწილეებმა ერთმანეთს გავუზიარეთ საკუთარი გამოცდილება, ვისაუბრეთ საზოგადოებაში არსებულ სტერეოტიპებზე და იმ მოლოდინებზე, რომლებიც ხშირად ახალგაზრდების, ქალების, კაცების თუ სხვადასხვა ჯგუფის მიმართ არსებობს. ამან დამანახა, რამდენად მნიშვნელოვანია განსხვავებული აზრის პატივისცემა და თანაბარი შესაძლებლობების შექმნა ყველასთვის.
შეხვედრის მეორე ნაწილი ფორუმთეატრს დაეთმო. რეალური ცხოვრების სცენარების გათამაშებით შესაძლებლობა გვქონდა, თავად შეგვეთავაზებინა პრობლემების გადაჭრის გზები, სხვადასხვა როლში წარმოგვედგინა თავი და გვეგრძნო, რომ ცვლილება სწორედ ჩვენი გადაწყვეტილებებით იწყება.
ეს შეხვედრა კიდევ ერთხელ დამარწმუნა, რომ თანასწორობა მხოლოდ თეორიული ცნება არ არის — ის ყოველდღიური არჩევანია. როდესაც ვუსმენთ ერთმანეთს, პატივს ვცემთ განსხვავებებს და ვქმნით თანაბარ შესაძლებლობებს, ვაშენებთ უფრო სამართლიან და ინკლუზიურ საზოგადოებას.
