2023 წლის საუკეთესო მოხალისის ეროვნული ჯილდო ნომინაციაში “ქართული კულტურის მხარდაჭერა” 16 წლის აჩიკო რევაზიშვილს გადაეცა.
rn
ის თელავის მუნიციპალიტეტში ცხოვრობს და სსიპ მერაბ კოსტავას სახელობის ქალაქ თელავის N4 საჯარო სკოლის მოსწავლეა.
rn
აჩიკოს მოხალისეობრივი საქმიანობა უკავშირდება ქართული კულტურის პოპულარიზაციას, ამ მიზნით 2023 წელს სამოქალაქო განათლების პროგრამის მხარდაჭერით ინგლისურ და გერმანულ ენებზე ბროშურები მოამზადა, ხოლო კომპანია „FSG Post“-ის ჩართულობით ბუკლეტები ევროპის სხვადასხვა ქალაქში გაიგზავნა.
rn
აჩიკომ თავის თანატოლებთან ერთად საინფორმაციო კამპანიას “ჩვენ და ევროპა” ერთი წლის მანძილზე ახორციელებდა, რომლის მიზანიც თელავში მცხოვრები მოზარდებისა და ახალგაზრდებისათვის ევროკავშირის შესახებ ინფორმირებულობის ამაღლება წარმოადგენდა. ის გამოირჩევა სასკოლო საზოგადოებაში აქტიური მოხალისეობით.
rn
“ერთ ჩვეულებრივ დღეს ჩვენს კლასში სამოქალაქო განათლების გაკვეთილი გვქონდა, სადაც ჩვენს ქვეყანაზე ვმსჯელობდით. კლასი ორ ბანაკად გაიყო: ისინი, ვინც ფიქრობდნენ, რომ ჩვენს ქვეყანას კარგი მომავალი არ ექნებოდა, და ისინი ვინც ფიქრობდნენ, რომ პირიქით, ჩვენს ქვეყანას ჩვენი თაობის ჩართულობით დიდი მომავალი ჰქონდა. ერთ-ერთ მომენტში დისკუსიაში მასწავლებელი ჩაერთო და ასეთი სიტყვებით მოგვმართა: … და თუკი თქვენს ქვეყანაში რაიმე არ მოგწონთ, იშრომეთ, და თქვენ შეცვალეთ…ეს სიტყვები ჩემი ცხოვრების ქვაკუთხედად მექცა და ჩემი აქტიური მოხალისეობაც აქედან დაიწყო…
rn
თავისთავად, მოხალისისთვის მოხალისეობაა უმთავრესი ჯილდო, როდესაც ვხედავთ ადამიანთა გახარებულ სახეებსა და იმ სარგებელს, რაც საზოგადოებისთვის მოგვაქვს. ვიყო ამ ჯილდოს გამარჯვებული, არის უდიდესი პასუხისმგებლობა. მსურს, რაც შეიძლება მეტი ახალგაზრდული პროექტი განვახორციელო ჩემს თემში, მსურს კიდევ მეტ ადამიანს მივაწვდინო ხმა, უფრო მეტი ახალგაზრდა გავააქტიურო და ჩვენი გარემო, ჩვენი ქვეყანა უკეთესობისაკენ შევცვალო.
rn
კვლავ დიდი ილია მახსენდება, რომელიც ამბობდა „რას ვეტყვი მე ჩემს ქვეყანას“… ჩემი აზრით, ეს ჯილდო, არის სიმბოლურად პასუხი ამ შეკითხვაზე… „ჩემო ქვეყანავ, ჩვენ ეს შევძელით“ – აჩიკო რევაზიშვილი