„წლის საუკეთესო მოხალისის ეროვნული ჯილდო“ – ეს არის ყოველწლიური ინიციატივა, რომელიც მიზნად ისახავს ახალგაზრდული მოხალისეობის მხარდაჭერასა და წახალისებას საქართველოში.

 ისტორია

ჯილდოს დაწესების იდეა ეკუთვნის ორგანიზაცია „ჰელფინგ ჰენდს“, რომელიც უკვე 15 წელზე მეტია აქტიურად მუშაობს მოხალისეობის განვითარების მიმართულებით.
დაფუძნების დღიდან ორგანიზაციამ განახორციელა ათობით პროექტი და შეიმუშავა მოხალისეობრივი პროგრამები ახალგაზრდებისა და სხვადასხვა საჭიროების მქონე ადამიანებისთვის.

პირველად კონკურსი ჩატარდა 2020 წელს, გაეროს ბავშვთა ფონდთან (UNICEF) და ახალგაზრდობის სააგენტოსთან თანამშრომლობით, პროექტის – „ახალგაზრდული მოხალისეობა COVID-19 პანდემიის საპასუხოდ“–ფარგლებში.
2021 წლიდან კონკურსი ტარდება საქართველოს მასშტაბით და მონაწილეობის შესაძლებლობა აქვთ როგორც მოზარდებს (13–18 წლის), ისე ახალგაზრდებს (19–29 წლის).

მიზანი

„წლის საუკეთესო მოხალისის ეროვნული ჯილდოს“ მიზანია:

• მოხალისეობის კულტურის მხარდაჭერა და პოპულარიზაცია;
• მოხალისეთა შრომისა და წვლილის დაფასება;
• მადლიერების გამოხატვა იმ მოქალაქეების მიმართ, რომლებიც უანგაროდ ეხმარებიან სოციალურად დაუცველ და სხვადასხვა საჭიროების მქონე ადამიანებს მთელი ქვეყნის მასშტაბით.

როგორ მიიღოთ მონაწილეობა

კონკურსში მონაწილეობის მისაღებად, ახალგაზრდები და მოზარდები რეგისტრირდებიან ახალგაზრდული მოხალისეობის პლატფორმაზე – www.youthvolunteering.ge.

პლატფორმაზე მონაწილეებს შეუძლიათ:

• განათავსონ საკუთარი მოხალისეობრივი პროექტები და შესრულებული საათები;
• მიიღონ კონსულტაციები და საგანმანათლებლო რესურსები;
• ჩაერთონ ტრენინგებში და განივითარონ საკუთარი უნარები.

აღნიშნული მოდელი ხელს უწყობს მოხალისეების საქმიანობის აღრიცხვასა და მათი სარგებლიანობის შეფასების მექანიზმების ჩამოყალიბებას საქართველოში.

ნომინაციები

მეორე ეტაპზე ჟიური ავლენს საუკეთესო მოხალისეებს სხვადასხვა თემატურ მიმართულებაში, მათ შორის:

• სოციალური სფერო
• ადამიანის უფლებების დაცვა
• გარემოს დაცვა
• მოხალისეობის პოპულარიზაცია
• განათლება
• კულტურა, სპორტი და ჯანსაღი ცხოვრება
• ჟიურის რჩეული
  და სხვა კატეგორიები.

 შერჩევის კრიტერიუმები

შეფასება მიმდინარეობს „მოხალისეობის შესახებ საქართველოს კანონის“ შესაბამისად.
ჟიური აფასებს კანდიდატებს შემდეგი კრიტერიუმებით:

• ლიდერობის დემონსტრირება მოხალისეობრივი საქმიანობისას;
• განხორციელებული პროექტების საჭიროება თემისთვის;
• გავლენა და შედეგიანობა საზოგადოებაში;
• ინოვაციურობა;
• შესრულებული საათების რაოდენობა.

ჟიურის შემადგენლობაში არიან სფეროს ექსპერტები, ფსიქოლოგები, ახალგაზრდული მუშაკები, მოხალისეობის თემის სპეციალისტები და წინა წლების გამარჯვებული მოხალისეები.

 ნომინაციის ვადები

კანდიდატების ნომინირება ტარდება ნოემბერში, სპეციალური განაცხადის ფორმის საშუალებით.

ვის შეუძლია წარდგენა?

• სამოქალაქო ორგანიზაციებს;
• პირებს, რომლებიც კარგად იცნობენ მოხალისის საქმიანობას;
• თავად მოხალისესაც შეუძლია საკუთარი თავის ნომინირება.

დაჯილდოების ცერემონია

ყოველწლიურად, 5 დეკემბერს, მსოფლიო მოხალისეობის საერთაშორისო დღეს, სპეციალური ჟიური ავლენს და აჯილდოებს წლის საუკეთესო მოხალისეებს ორ ასაკობრივ კატეგორიაში — მოზარდებს (13–18) და ახალგაზრდებს (19–29) შორის.